फागुनको १४ गतेबाट रिलिजमा आउन लागेको फिल्म ‘मायाबी’ गीतसंगीत र आक्रामक प्रचारका कारण चर्चामा छ । फिल्मको दुई वटा गीत सार्वजनिक भइसकेका छन् भने फेरि निर्माणपक्षले फिल्ममा समावेश नयाँ गीत ‘सितारा जडेको’ सार्वजनिक गरेको छ ।
दिक्षित पौडेल र समिरा थपलियाको स्वर, शम्भुजित बास्कोटाको संगीत, दयाराम पाण्डे र दिवाकर भट्टराइको शब्द रहेको गीत दिवाकर भट्टराइले नै कोरियोग्राफी गरेका छन ।
विवाहको परिवेशमा तयार पारिएको गीतको भिडियोमा फिल्मका मुख्य कलाकारहरु पल शाह, दीपिका प्रसाँई, समीम खान (नव-नायक), प्रशान्त ताम्राकार, सुशील सिटौला, करिश्मा श्रेष्ठ चित्रित छन् । दीपिकाको समीमसँग विवाह भइरहँदा पल भावुक देखिएका छन् । दीपिका पनि पललाई हेर्दै भावुक बनेको देख्न सकिन्छ । यसले उनीहरुको प्रेम वियोग दर्शाउँछ ।
यो फिल्ममा राजु विक्रम थापाको डीओपी, मिलन श्रेष्ठको सम्पादन छ । दिवाकर भट्टराइको लेखन तथा निर्देशनमा तयार भएको यो फिल्ममा लक्ष्मी गिरी, अंशु महर्जन, रवि डंगोल, रमा प्रसाँई, दीपेन्द्र सिम्खडा, संगीता सिलवाल लगायतका कलाकारहरुको पनि अभिनय छ ।
ध्रुव न्यौपाने, राज कटुवाल र चन्द्र पन्तको लगानी रहेको फिल्ममा मञ्जु भण्डारी, राजु पराजुली र सुमिन ओली सह–निर्माताको रुपमा छन् । प्रविण भट्टराई र करण सिंह कार्यकारी निर्माता रहेको यो फिल्ममा नेम महर्जनको पनि लगानी छ l यो फिल्म दीवाकर भट्टराईको पाँचौं फिल्म हो ।
