फिल्मको प्रचारप्रसारका लागि प्राय गीत, टिजर वा ट्रेलर सार्वजनिक गरिन्छ । तर, आगामी फागुन २ गतेबाट प्रदर्शनमा आउन लागेको फिल्म ‘दुःखी आत्मा’को निर्माण टिमले भने फरक प्रयोग गर्दै बिहीबार ‘ब्रेकअप कविता’ नाम दिएर एक भिडियो सार्वजनिक गरेको छ l ‘माया, तिमी यसलाई एक घटना संझ । विन्ती यसलाई दुर्घटना नसंझ । संझ सायद, यसरी छुट्नु नै भएको थियो भेट हाम्रो ।’ उल्लेखित कविताको हरफ फिल्मका मुख्य अभिनेता दयाहाङ राईले अभिनेत्री आँचल शर्मालाई कविता पढेर सुनाइरहेका छन् । जसलाई ‘ब्रेकअप कविता’को रुपमा सार्वजनिक गरिएको छ ।
उक्त कविताले सहमतिमा प्रेम सम्बन्ध टुंग्याएका जोडीको भाव अभिव्यक्त गर्छ । सार्वजनिक कवितामा दयाहाङ राइको आवाज सुन्न पाइन्छ । कवि श्रवण मुकारुङले लेखेका १० वटा कविताहरु यो फिल्ममा समावेश छन् । सार्वजनिक भिडियोमा दयाहाङ र आँचलबीचका प्रेमिल दृश्यहरु पनि छन् । केही दृश्यमा भने दयाहाङलाई निराश भावमा देख्न सकिन्छ ।
दीपेन्द्र लामाको लेखन तथा निर्देशन रहेको फिल्मलाई हिमाल कडरियाले निर्माण गरेका हुन् फिल्ममा दयाहाङ र आँचलसहित अनुप विक्रम शाही, कविता आले , वुद्दि तामाङ, रेयर राई, पुष्कर गुरुङ, लगायतको अभिनय छ । सुदीप बराल कार्यकारी निर्माता रहेको फिल्ममा आलोक शुक्लाको छायांकन तथा निमेष श्रेष्ठको सम्पादन छ । फिल्ममा रामजी लामिछानेको कोरियोग्राफी छ ।
केही दिनअघि सार्वजनिक टिजरले दर्शकमाझ ‘दुःखी आत्मा’को राम्रो हाइप बनाएको छ । यो फिल्मलाई निर्माणपक्षले एडल्ट ड्रामा भनेको छ ।
