काठमाण्डाै – चीनको सिगात्से केन्द्रविन्दु भएर गएको भूकम्पका कारण नेपालमा पनि सामान्य क्षति भएको छ । भूकम्पको धक्का काठमाण्डौ उपत्यकासहित पूर्वी र मध्य नेपालमा महसूस भएको थियो ।
भूकम्पले ठूलो क्षति नपुर्याए पनि सामान्य क्षति पुगेको गृह मन्त्रालयले जनाएको छ । प्रदेश प्रहरी कार्यालय विराटनगरले सोलुखुम्बु, सङ्खुवासभा, ओखलढुङ्गा र ताप्लेजुङमा भूकम्पले ६ वटा घरमा क्षति पुगेको जनाएको छ ।
यसैगरी काठमाण्डौको स्युचाटारमा एक जना व्यक्ति घरको छतबाट हाम फाल्दा घाइते भएका छन् । यस्तै बाराको कलैया उपमहानगरपालिका वडा नम्बर १ को त्रिचन्द्र माविका कक्षा ७ र ८ मा पढ्ने ११ जना विद्यार्थी बेहोश भएका छन् । सामान्य उपचारपछि उनीहरू घर फर्किएका छन् ।
प्रहरीले क्षतिको विवरण सङ्कलन भइरहेको जानकारी दिएको छ । चीनमा भने ५३ जनाभन्दा धेरैको ज्यान गएको छ ।
