तिहारको अवसर पारेर लक्ष्मीपूजाको दिन अर्थात कात्तिक १५ गते बाट प्रदर्शनको तयारीमा रहेको फिल्म ‘पूर्ण बहादुरको सारङ्गी’को ट्रेलर सार्वजनिक गरिएको छ । बिहीवार काठमाडौंमा एक कार्यक्रमको आयोजना गर्दै फिल्मको ट्रेलर सार्वजनिक गरिएको हो । सारङ्गी बजाएर जीविको पार्जन गर्ने गन्धर्व समुदायको जीवन र सामाजिक समस्यालाई केन्द्रमा राखेर निर्माण गरिएको सामाजिक कथामा फिल्म केन्द्रित छ । फिल्मको सार्वजनिक ट्रेलरमा दु:ख, प्रेम र संघर्षलाई प्रस्तुत गरिएको छ ।
ट्रेलरले अभिनेता विजय बरालले निभाएको पूर्णबहादुर पात्रलाई पछ्याउँछ, जसले छोरालाई शिक्षित बनाउने सपना देखेको छ । उनको छोराको भूमिका अभिनेता प्रकाश सपूतले निभाएका छन् ।
सेभेन सिज र बासुरी फिल्मसको प्रस्तुति रहेको यो फिल्मको निर्माता विनोद पौडेल र प्याट्रिक सुवेदी हुन् ।
सरोज पौडेलको कथा तथा निर्देशनमा बनेको फिल्ममा विजय र प्रकाशसहित अन्जना बराइली, मुकुन भुसाल, माओत्से गुरुङ, विनोद न्यौपाने, शंकर आचार्य, बुद्धि तामाङ, देशभक्त खनाल, भोलाराज सापकोटा, अलिसा बास्तोला, श्याम केसी, सरिता शाह लगायतको अभिनय छ । फिल्मको कार्यकारी निर्माता रमेश चौलागाईं, हरि श्रेष्ठ, र रमेश ढकाल रहेका छन् ।
