अभिनयमा सक्रिय रहेका अभिनेता सलोन बस्नेतले पछिल्लो समय फिल्म निर्माणमा पनि आफ्नो उपस्थिति बढाइरहेका छन् । उनी प्रस्तुतकर्ता रहनेगरी फिल्म ‘रंगी’ सलोन सलिना फिल्मस् प्रालिको ब्यानरमा निर्माण हुने भएको हो । गत वर्ष ‘जय हो’ बनाएका उनी यसै वर्ष फिल्म ‘यूनिभर्सिटी अफ गुन्डाज्’ निर्माणको तयारीमा छन् । निर्माण घोषणा गरेसंगै यो फिल्मको पोस्टर सार्वजनिक गरिएको छ ।
साइकलमा बसेकी एक बालिकासँग खेल्दै गरेका एक पुरुषलाई पोस्टरमा चित्रित गरिएको छ ।यो दृश्यले बाबु-छोरीको सम्बन्धलाई चित्रण गर्ने संकेत गर्छ । फिल्मले बाबु-छोरीको भावनात्मक सम्बन्धको कथालाई उठाउन लागेको पोस्टरले बुझाउँछ । सक्षम सुवेदी निर्माता रहेको ‘रंगी’को प्रस्तुतकर्ता सलोन बस्नेत हुन् ।
सुरेश न्यौपानेले यस फिल्ममार्फत निर्देशनमा डेब्यू गर्न लागेका छन् । यो उनको पहिलो निर्देशकीय फिल्म हुनेछ । उनीसँग ‘छक्का पञ्जा’, ‘यात्रा’, ‘ए मेरो हजुर २’, ‘म यस्तो गीत गाउँछु २’, ‘कृ’ लगायतका फिल्ममा मुख्य सहायक निर्देशक भएर काम गरेको अनुभव छ । आगामी असोज ११ गतेदेखि काठमाडौंबाट छायांकन सुरु हुन लागेको फिल्मका लागि केही दिनमा कलाकार फाइनल हुने जनाइएको छ ।
