काठमाडौं । प्रहरीले काठमाडौंका कलंकीबाट नक्कली नोटसहित दुई जनालाई पक्राउ गरेको छ । जिल्ला प्रहरी परिसर काठमाडौंको टोलीले शनिबार राति काठमाडौं महानगरपालिका–१४ कलंकीमा ५ लाख १४ हजार नक्कली नोटसहित दुई जनालाई पक्राउ गरेको हो ।
उनीहरुको साथबाट एक हजार र पाँचसय दरका नोट बरामद गरेको परिसरले जनाएको छ । पक्राउ पर्नेमा काठमाडौं महानगरपालिका वडा नम्बर १४ बस्ने वर्ष ४७ की तारा देवी डंगोल र नागार्जुनकी ४१ वर्षकी निलिमा श्रेष्ठ छन् ।
डंगोलले नक्कली नोटको कारोबार गरेको भन्ने सूचनाको आधारमा जिल्ला प्रहरी परिसर काठमाडौंबाट खटिएको प्रहरीले उनको पसल तलासी गर्दा नक्कली नोट फेला पारेको प्रहरीले जनाएको छ ।
