मानिसहरु केवल दुई दृष्टिकोणबाट प्रख्यात हुन्छन्- कि राम्रो काम गरेर, कि खराब काम गरेर।
हतियार उठाएर कुख्यात आतंकवादी बनेका ओसामा विन लादेनले विश्वका शक्तिशाली देशहरुलाई समेत नराम्ररी प्रभाव पारे। उनलाई सबैले एक खतरनाक आतंकवादी भनेर चिने। तर, उनी कसरी आतंकवादी बने भन्नेबारे कमैलाई थाहा छ।
उनको वास्तविक पुरा नाम ‘उसामा विन मोहम्मद विन अवाद विन लादेन’ हो। उनको जन्म सन् १९५७ मार्च १० का दिन साउदी अरबको एक सम्पन्न परिवारमा भएको थियो।
उनका बुबा मोहम्मद लादेन एक धनाढ्य अर्बपति तथा सफल व्यवसायी थिए। साउदीका सबैभन्दा धनीका सूचीहरुमा उनको बुबाको नाम पनि थियो।
उनको आमाको नाम थियो, हमेदा लादेन। जो, मोहम्मदकी दशौँ श्रीमती थिइन्।
ओसामा जन्मिएको डेढ वर्षपछि उनका बाबुले आमालाई ‘डिभोर्स’ दिए। त्यसपछि उनकी आमाले उनलाई हुर्काउन केही दुखद दिनहरुको सामनासमेत गर्नु पर्यो।
अन्ततः तीन वर्षपछि उनकी आमाले पनि आफ्नै पूर्वपतिको सहयोगीसँग विहे गरिन्। त्यसयता ओसामाले आफ्ना सौतेनी भाइहरुसँग पढाइ गर्नुपर्यो।
सन् १९६८–१९७६ सम्म उनले अलथाइगर मोडेल स्कुलमा पढे। पढाईको मामलामा उनी अब्बल नै हुन्। उनी सधैँ कक्षामा प्रथम हुन्थे।
उनले किङ अब्दुलाजिज युनिभर्सिटीबाट अर्थशास्त्रमा डिग्रीसमेत पुरा गरे। त्यति मात्रै होइन, उनले सिभिल इन्जिनियर र प्रशासनमा समेत ‘ग्र्याजुयशन’ गरेका थिए।
उनको विषयमा एउटा के रोचक रहस्य छ भने, उनले १७ वर्षको उमेरमै विवाह गरेका थिए- सिरियाकी युवती नाज्वा घानेमसँग।
विवाहको मामलामा उनले पनि सात जनासँग विहे गरेका थिए। ती श्रीमतीहरुबाट कुल २४ सन्तानको बाबु थिए, ओसामा।
सन् १९७९ उनी पाकिस्तान गए। जहाँ उनको भेट अब्जुला हजामसँग भयो।
सम्बन्ध बलियो बन्दै गएपछि उनीहरुले आफ्नो सम्बन्ध र सञ्जाललाई अन्य ४० मुस्लिम देशहरुसम्म पुर्याए। विस्तार गरे। जसको कारण उनीहरुलाई विभिन्न अरबी देशहरुबाट हतियार आयात गर्न सजिलो भयो।
त्यतिबेला पाकिस्तानलाई आर्थिक सहायतको नाममा साउदी अरब र अमेरिकाले ठूलो सहयोग गरेका थिए। ओसामा र अब्जुलाले त्यसको ठूलो उपयोग गरे।
उनीहरुले पाकिस्तानका तत्कालिन ‘आइएसआइ’का जर्नल हमिद गुलसँग पनि हात बढाए। अब्जुला हजामलाई प्रयोग गरेर उनले सन् १९८४ मा ‘मक्त अल खिदामत’ नामक अन्तराष्ट्रिय संस्था खोले। यही संस्थाको नामबाट उनले विश्वभर हतियार निर्यात र आयात गरे।
त्यतिबेला उनको मुख्य लक्ष्य भनेको सोभियत समर्थित अफगानस्तानको शाषण व्यवस्था ध्वस्त पार्नु थियो।
उनले पहिलो पटक पाकिस्तानको खाइबर पाक्थुनखवामा आफ्नो गोप्य क्याम्प निर्माण गरे। जहाँबाट मुस्लिमहरुलाई उनले प्रशिक्षण दिन सुरु गरेका थिए।
खाइबर पाक्थुनखवामा रहेको गोप्य क्याम्पबाटै उनले पहिलो आक्रमण र हमलाको योजना बनाएका थिए। र सन् १९९२ डिसेम्बर २९ मा उनले यमनको आदेनमा पहिलो पटक आक्रमण गरेका थिए।
सन २००१ मा उनले संयुक्त राज्य अमेरिकालाई समेत हमला गरेका थिए। जसको कारण संयुक्त राष्ट्र सुरक्षा परिषदले उनको समूहलाई आधिकारिक रुपमा आतंकवादी घोषणा गरेको थियो।
जर्जटाउन युनिभर्सिटीका प्रध्यापक तथा आतंकवाद विज्ञ ब्रुस हफम्यानले उतिबेलै ओसामाले गरिरहेका हतियार हिंसाले उनलाई नै धरापमा पार्ने बताएका थिए।
ओसामाको समूहलाई ‘अल काइदा’ नामले चिनिएको थियो। समूहमा ओसामाको दाहिने हात तथा मास्टर माइन्डको रुपमा खालिद शेख थिए।
दोस्रो पटक उनले सन् १९९३ मा अमेरिकाको वल्र्ड ट्रेड सेन्टरलाई लक्षित गरेर हमला गरेका थिए। जसमा ६ जनाले ज्यान गुमाएका थिए।
त्यस्तै सन् २००१ मा उनले पेन्टागन र पेन्सल्भेनियामा हमला गरे। जसका कारण तीन हजारभन्दा बढीकाे ज्यान गुएकाे थियाे।
सन् २००५ मा पनि उनले स्पेनको एउटा रेलमा बम हमला गरे। जसका कारण १९१ जनाले घटनास्थलमै ज्यान गुमाए भने १८०० भन्दा बढी घाइते भए।
सन २००५ मै उनले लन्डनको विद्युतीय रेलमा हमला गरे। जसका कारण ५२ जनाले ज्यान गुमाएका थिए भने सात सयभन्दा बढी घाइते भए।
-एजेन्सीकाे सहयाेगमा
