नेपाली चलचित्र क्षेत्रका चल्तीका नायकहरु राजेश हमाल, दयाहाङ राई, आर्यन सिग्देल, अनमोल केसी, प्रदिप खड्का, पल शाह, सौगात मल्ल, विपिन कार्की लगायतसँग पर्दा शेयर गर्ने चाहना धेरै कलाकारमा हुन्छ । अझ, नयाँ कलाकारहरुमा त यी चल्तीका नायकहरुसँग काम गर्दा करिअर नै फेरिने आशा समेत हुन्छ । तर, सबैले यो मौका भने पाउँदैनन् ।
नायिका उपासना सिंह ठकुरी भने यो अर्थमा भाग्यमानी देखिएकी छिन् । उनले, आफ्नो डेब्य चलचित्रदेखि लगातार चलचित्र बजारमा सर्वाधिक क्रेज भएका कलाकारसँग नै पर्दा शेयर गरिरहेकी छिन् ।
उपासनाले पहिलो चलचित्रमा नायक अनमोल केसीसँग काम गरिन् । चलचित्र बजारमा के समेत भनिन्छ भने, नायक अनमोल केसीसँग काम गर्ने नायिकाको करिअर बदलिन्छ । अनमोलसँग काम गरेका केही नायिका स्टार भएका छन् । साम्राज्ञी राज्यलक्ष्मी शाह, आना शर्मा, श्रृष्टी श्रेष्ठ, सुहाना थापा यसका उदाहरण हुन् । उपासनाले चलचित्र ‘क्याप्टेन’मा अनमोलसँग काम गरेकी थिइन् ।
उनले, दोश्रो चलचित्रमा नायक दयाहाङ राइसँग काम गरिन् । दयासँग ‘कबड्डी’को तेश्रो सिरिजमा काम गरेकी उनको करिअर चम्कियो । यो चलचित्रले करिब १० करोड ग्रस व्यापार गर्यो । उपासनाको क्रेज ह्वात्तै माथि पुग्यो ।
उपासना, आफ्नो तेश्रो चलचित्र ‘डिसेम्बर फल्स’मा नायक आर्यन सिग्देलसँग काम गरिरहेकी छिन् । नायक सिग्देलको क्रेज चलचित्र बजारमा राम्रो मानिन्छ । केही बर्ष अगाडिसम्म आर्यन चलचित्र क्षेत्रकै नम्बर १ नायक समेत थिए । चकलेटी यी नायकसँग पर्दा शेयर गर्दा उपासनालाई पक्कै पनि फाइदा हुनेछ ।
उपासनाले चौथो चलचित्रको रुपमा ‘सत्यम्’मा काम गर्न लागेको चर्चा छ । यो चलचित्र उनले साइन गरिसकेकी छैनन्, तर मौखिक रुपमा सहमती भने दिइसकेकी छिन् । यो चलचित्रमा नायक राजेश हमालले काम गर्दैछन् । राजेश हमालसँग चौथो चलचित्रमा पर्दा शेयर गर्न लागेकी उपासनाका लागि यो पक्कै पनि सुखद कुरा हो । चलचित्रमा पल शाह पनि रहने चर्चा छ ।
यसरीहेर्दा, आफ्नो करिअरको छोटो समयमा नै उपासनाले लोभलाग्दो फड्को मात्र मारेकी छैनन्, देशकै चर्चित नायकहरुसँग काम पनि गरिरहेकी छिन् । यसअर्थमा, उनलाई भाग्यमानी पनि मान्न सकिन्छ । तर, उपासनाको मिहिनेतले पनि उनलाई यो स्थानमा ल्याएको भुल्न भने हुँदैन ।
