काठमाडौं । ‘रेलिमाई’ गीतले अपार सफलतापछि ‘रेलिमाई–२’ ल्याइएको छ । करिब आठ महिनाअघि रिलिज गीत ‘रेलिमाई’ले निकै चर्चासहित सफलता पाएपछि गायक तथा मोडल आर्जनले ‘रेलिमाई २’ लिएर आफ्ना स्रोता र दर्शकमाझ लिएर आएका हुन् । निकै चचा बटुलेको आर्जन पाण्डे र इन्दिरा जोशीले स्वर भरेको यो रेलिमाई युट्युवमा ७५ लाखभन्दा बढि पटक हेरिएको छ । यस गीतको भिडियोमा आर्जन र ईन्दिरा नै फिचर छन् ।
यसको अपार सफलतापछि आर्जनले भिडियोसहित रेलिमाई २ ल्याएका हुन् । रेलिमाई सिक्वेललाई आर्जनले ‘झिमिक्कै परेली’ शीर्षक दिएका छन् । फिमेल भोकलमा मेलिना राईले साथ दिँदा भिडियोमा भने आर्जनले अभिनेत्री केकी अधिकारीसँग जोडी बाँधेका छन् ।
आर्जन र केकी प्रेमी प्रेमिका रहेको विभिन्न मिडियामा दाबीसहित समाचार आइरहेका बेला उनीहरु एउटै गीतमा देखापरेका हुन् । विशाल भण्डारीले निर्देशन गरेको सो भिडियोमा सम्पादन प्रविण श्रेष्ठको छ भने छायाँकन अर्जुन तिवारी एण्ड टिमको छ ।गीतमा संगीत भने प्रतिक पौडेलले भरेका छन् । रेसुभिल्ला आसपासमा खिचिएको गीतको भिडियोलाई निर्देशक भण्डारीले फिल्मी शैलीमा आकर्षक बनाएका छन् ।
