निर्देशक अर्जुन सुवेदिले आफ्नो दोस्रो फिल्म ‘सोल्टिनी’को प्रमुख अभिनेता प्रकाश सपुत र अभिनेत्री परीक्षा लिम्बुलाई फिचर्ड गर्दै छायांकन अगाबै पहिलो आधिकारिक पोस्टर सार्वजनिक गरेका छन।फिल्ममा कलाकारहरुको बलियो ‘लाइनअप’ बनाएका उनले यसमा फरक जातीय पृष्ठभूमिका दुई पात्रको प्रेमकथा प्रस्तुत गर्दैछन् । सपूतले ‘भीमसेन पोखरेल’ र लिम्बुले ‘दिलासा राई’ को भूमिका निर्वाह गर्दैछन् ।
छायांकनका लागि तयारी भइरहँदा आइतबार फिल्मको भाव बुझाउने एक पोस्टर सार्वजनिक गरिएको छ, जसमा प्रकाश र परीक्षा चित्रित छन् । उनीहरुलाई भावुक मुद्रामा देख्न सकिन्छ । यतिबेला फिल्मको वर्कसप चलिरहेको छ l भोजपुरको प्राकृतिक सौन्दर्यतामा छायाङ्कन हुने ‘सोल्टिनी’ जातीय भेदभाव र समाजमा रहेको अमानवीयताविरुद्ध आवाज उठाउने कथामा केन्द्रित छ फिल्ममा विल्सन विक्रम राई, सब्बु गुरुङ, रवीन्द्र झा, प्रकाश घिमिरे, प्रेम सुब्बा, कविता आले, सुन्दर धिताल, र सुजन खतिवडाको पनि अभिनय रहनेछ ।
प्लानेट थ्री फिल्म्सको प्रस्तुति तथा नेपसिने र योलो इन्टरटेन्मेन्टको सहकार्यमा निर्माण हुने फिल्मका लेखक अर्जुन सुवेदी र कुमार भट्टराई हुन् । सुशन प्रजापतिको छायांकन रहने फिल्मको गीतमा प्रशान्त सिवाकोटी र हर्कुलस बस्नेतले संगीत दिनेछन् l फिल्मलाई २०८२ साल असोज ३ गते अर्थात् संविधान दिवसको दिन रिलिज गरिने जनाइएको छ ।
