जर्मन बुन्डेस लिगा अन्तर्गत गएरातिकाे खेलमा बायर्न म्युनिख बराबरीमा राेकिएकाे छ । उ घरेलु टाेली बाेरूसिया डर्टमन्डसँग २-२ काे बराबरीमा राेकिएकाे हाे ।
सिंगल इडुना पार्कमा सुरूवाती २ गाेलकाे अग्रता जाेगाउन नसक्दा १० खेलाडीमा समेटिएकाे बायर्न अंक बाँड्न बाध्य बन्याे ।
खेलकाे ३३औं मिनेटमा लियोन गोरेट्जकाले बायर्नलाई सुरूवाती अग्रता दिलाएका थिए । ५३ औं मिनेटमा लिराेय सानेले पाहुना टाेलीकाे अग्रता दाेब्बर बनाए ।
७४ औं मिनेटमा डर्टमन्डका युसुफा मोकोकोले गाेल गर्दै खेललाई २-१ काे स्थितिमा ल्याए । ९० औं मिनेटमा किङ्सले काेम्यानले दाेहाेराे पहेँलो कार्ड बेहाेर्दै मैदान छाडेपछि बायर्न १० खेलाडीमा समेटियाे ।
थप गरिएकाे समयमा एन्थोनी मोडेस्टले घरेलु टाेलीका लागि गाेल गरेपछि खेल २-२ काे राेमाञ्चक बराबरीमा सकिएकाे हाे ।
याे नतिजासँगै ९ खेलमा समान १६ अंकका साथ बायर्न तेस्रो तथा डर्टमन्ड चाैथाे स्थानमा छन् । लिगअन्तर्गतकै अन्य खेलमा बाेचुम र लिभरकुसेनले जित हात पार्दा उल्फ्सबर्ग र लाइप्जिग बराबरीमा राेकिएका छन् ।
