फिल्म क्षेत्रमा अभिनेत्रीहरुबीच खासै राम्रो मिल्ती भएको देखिन्न । देखिएका पनि धेरै लामो समय टिकेका छैनन् । तर, अभिनेत्री द्वय केकी अधिकारी र रीमा विश्वकर्माबीचको मित्रता भने वर्षौंदेखि सुमधुर छ । उनीहरुको मित्रतालाई फिल्म क्षेत्रमा उदाहरणको रुपमा समेत लिने गरिन्छ । वास्तविक जीवनमा असल साथी रहेका उनीहरुबीच व्यावसायिक सहकार्य पनि हुँदै आएको छ ।
केकी र रीमाको फिल्म करिअरको सुरुवात एकै समयमा भएको थियो । फिल्म ‘स्वर’ बाट अभिनेत्रीको रुपमा डेब्यू गरेका उनीहरुले एक दशक लामो फिल्म करिअरमा विभिन्न उतार- चढावको सामना गरे । यी दुईमध्ये संख्यात्मक हिसाबले केकीले धेरै फिल्ममा काम गरेकी छन् । उनको अहिले पनि फिल्ममा राम्रो माग छ । रीमा भने उद्घोषिकाको रुपमा बढी चलेकी छन् ।
‘स्वर’ पछि केकी र रीमाले फिल्म ‘कोहलपुर एक्सप्रेस’ को एक गीतमा एकसाथ ठुम्का लगाएका थिए । तर, फिल्ममा रीमाको भने अभिनय थिएन । कोरोनाका कारण अनिश्चितकालका लागि प्रदर्शन स्थगित भएको फिल्म ‘हिजो आजका कुरा’ मा भने उनीहरुले स्क्रिन साझेदारी गरेका छन् । योसँगै उनीहरुबीच कमेडी रियालिटी शो ‘कमेडी च्याम्पियन’ मा पनि सहकार्य हुँदै आएको छ ।
लकडाउन खुकुलो भएपछि ‘कमेडी च्याम्पियन’ को दोस्रो सिजनको शिलशिलामा केकी र रीमाको दैनिक रुपमा भेट भइरहेको थियो । तर, राजधानीमा निषेधाज्ञा लागू भएपछि उनीहरु घरभित्र थुनिएका छन् । बिहीवार रीमाले इन्स्टाग्राममा केकीसँग फन्नी अन्दाजमा खिचेका दुई तस्विर शेयर गरेकी छन् । जसमा उनले केकीको लकडाउन पोस्ट हेर्न आतुर रहेको उल्लेख गरेकी छन् ।
आफ्नो नाममा खोलेको यूट्युब च्यानलमा रीमाले केकीसँगको मित्रताको बारेमा ‘मेरो एउटा साथी छ’ नाम दिएर केही भिडियोहरु राखेकी छन् । गएको अगस्ट १ मा अपलोड भएको एक भिडियोमा उनले एक दशकभन्दा लामो सहयात्रामा आफ्नो हरेक उतार-चढावमा बलियो सहारा बनेकोमा केकीलाई धन्यवाद व्यक्त गरेकी थिइन् । साँच्चै, यी दुई अभिनेत्रीको मित्रता उदाहरणीय छ ।
